.jpg)
الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه
بالحراميه
الفول كتير والطعميه
والبر عمار
والعيشه معدن واهي ماشيه
اخر اشيا
مادام جنابه والحاشيه
بكروش وكتار
ح تقول لى سينا وما سينا شي
ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون
او كل الكون
العمر اصلا مش مضمون
والناس اعمار
الحمدلله وأهي
ظاطت
والبيه حاطط
في كل حته
مدير ظابط
وإن شالله
حمار
ايه يعني فى العقبه جرينا
ولا ف سينا
هى الهزيمه تنسينا
اننا احرار
ايه يعني شعب ف ليل ذلة
ضايع كله
دا كفاية بس اما تقول له
احنا الثوار
الحمد الله ولا حولا
مصر الدوله
غرقانة فى الكدب علاوله
والشعب احتار
وكفايه اسيادنا البعدا
عايشين سعدا
بفضل ناس تملا المعده
وتقول اشعار
اشعار تمجد وتماين
حتى الخاين
وان شا الله يخربها مداين
عبد الجبار
.jpg){kind=link}
6 comments:
ليه دايما بنجيب اللوم على اللى ملجمنا و حاجب عننا نور الشمس ليه مش بنقول ان من اعمالنا سلط علينا يعنى اكيد يا صاحبى احنا فينا حاجه غلط يمكن يكون سكوتنا ده هو اللى غلط و هو اللى مخلينا عايشين فى حال تمجيد للاهوال و ضياع و اصطناع هى ديه القضيه يا هيما
ما حدش عارف مين بيجرى ورا مين
يا ترى الخادم بيجرى على عيشه و اللا الحاكم هو اللى بيدى العيش لغيره
تحياتى يا نجم
بص يا شريف اللوم علي اللي ملجمنا لأأن احنا مجرد قطيع ماشي ورا راعي لاهو راعي ولا مسئول و بيسيب القطيع وينام في العسل الجديد بقي ان الديابة من جوه القطيع اللي يسرق اللي يرتشي اللي يبيع ارض البلد بفلوس التراب للقطريين واليهود و حالة التمجيد دي مش بسبب السكوت دي بسبب الجري ورا لقمة العيش يا ريس الحاكم مابيديش لقمة عيش الوطن لغيره الحاكم بيدي الفاكهة واللحمة والتقايل للغريب وابن البلد يضرب دماغه في الحيط الحيط اللي حامية الاجنبي اللي بياكل خضار وفواكه اورجانيك
ابراهيم
انا بوستى الجديد نزل يا ريت اشوف تعليقك بقى يا مؤسسه
سلااااااااااام
يا خويا الي بيشيل قربة مخرومة بتخر علي دماغه..؛والقربة تعبت من كترالترقيع وطفح بها الكيل ؛لكل ليل فجر ولكل نهار شمس والحياة مش حياة من غير أمل ؛تحياتي يازعيم ؛ومستنية تعليقاتك
اللي بيشيل قربة مخرومة بتخر علينا كلنا لان احنا اللي شيلناه القربة و هو افتكر ان القربة بتاعته البلد دي هي القربة والباقي انتي عارفاه تحياتي يا شهرزاد
Post a Comment